Friday, June 15, 2018

വാതിൽ

വാതിൽ
********

മൃതിയെന്നാൽ അവസാനമാകുന്നില്ലലോ
അതൊരു വാതിൽ മാത്രമാണ്,
ഇരുമുറികളിലായ് നമ്മെ ഒറ്റപ്പെടുത്തുന്ന
നമുക്കിടയിലെ അടഞ്ഞ വാതിൽ
വാതിലിനിരുപുറം നീ നീയും , ഞാൻ ഞാനുമാണ്
നമുക്കൊരേ ഓർമ്മകളാണ്,

കൊഴിഞ്ഞു പോയ നാളുകളും
കരഞ്ഞു തീർത്ത നോവുകളും
നെയ്തു കാത്തുവച്ച സ്വപ്നങ്ങളും
നമുക്കിന്നും ഒരുപോലെയാണ്

പൊട്ടിച്ചിരികളായിരം വിരിഞ്ഞു കൊഴിഞ്ഞ
നിന്റെ ചൊടിയിലെ മൗനം
എന്റെ തടവറയിലെ  ഇരുട്ട് കൊഴുപ്പിക്കുന്നു
തേങ്ങി കരയുന്ന നിന്റെ നിശ്വാസത്തിന്റെ
താപം
ഈ തടവറയിൽ വരണ്ട കാറ്റായ് വീശുന്നു

അടഞ്ഞ മുറികളിൽ ഒരേ മനസ്സുമായ്
ഇനിയുമേറെ കാത്തിരിക്കാം നാം
മൃതിയുടെ വാതിൽ നമുക്കിടയിൽ ഒരുനാൾ തുറക്കപ്പെടും
ഈ ഒറ്റമുറിയിൽ നാം വീണ്ടും ഒന്നിച്ചു ചേരുവാൻ..

No comments:

Post a Comment